ابوذيات ولا اروع للشاعر الكبييير عبد الحسين الحلفي

**العميد نهاد العراقي** · 2009-05-19, 06:23 AM

سلام عليكم
شلونكم
هاي ابوذيات للشاعر الكبير والمبدع عبد الحسين الحلفي
اتمنى ان تنال اعجابكم

<<<<<<<>>>>>>>>

يكر بيهه العشك شكد شكربي
كتاب من الصبر عندي شكر بي
شورطني وبست خدك شكر بي
بسته ومرض سكر صار بيهه

مدلل ما تهيد انت ولاهد
وتكضني حيل متهدني ولاهد
عليه اتهد واكوملك ولاهد
واصير وياك حتى نهد عليه

لعتب عالكتب هالدستور عالسن
بوطنه زعلت الضحكات عالسن
علاسه والشعب معلوس علسن
وقفلته وانعلس قفل البوذيه

الوجود شفرقه كلي من عدمنه
وشمل منع التجول منع دمنه
وتدري ليش احنه منعدمنه
لان موته انولدنه اعله الوطيه

عليك القيت حجه والقي يامه
ويامه براسك احجي والقي يامه
تدري الحشر يمته والقيامه
القيامه والحشر زعلك عليه

لساني لو تحبني شاطراني
واكرهه الذي بحبك شاطراني
اخذت 100 بمحبتك شاطر اني
اذا غصبا عليك تصير اليه

لركبتك عيني دارت لافت الهه
ومرد روحي جمالك لا فتلهه
ماتت روحي علك لافته الهه
وشهيد انحسب بس ابجي عليه

باد الحيل واتعس بيده هايه
وطلع ماكر حبيبي بي دهايه
سالمني وشبكني بيده هايه
وبيده الثانيه يأشر عليه

الجرح جرحك يكلبي ماشفيته
الحلو الموزون مشيه ماشي فيته
شمالك من تعده ماشفيته
جاحاجيته بلكي يصير اليه

رغم كل الهموم العلي رئساً
عشت مرفوع ما دنكت رئساً
ومن انته ازعلت فجئتاً رئساً
رئساً راسي دنك بين اديه

حرت ما بين اتاني ما اتاني
ومو ميه الشماته ما اتاني
اتاني والاريده ما اتاني
اجه المارايده ووغف عليه

مجرد شك اشكاً هاشكو شبيك
تكش بوجهي لكن هاشكش بيك
اشك حلكه اليغثك هاشكو شبيك
واذا اغثك اشك حلكي بديه

قضية اسمك على اسمك ما شخطنة
ازدحام احنة على دربك ماشي خطنة
شتضن من كد حلاتك ما شخطنة
اليشوفك ينشخط مية بالمية