هجرك يا ولف صاير بلا حد

**العميد نهاد العراقي** · 2009-09-09, 05:52 AM

هجرك يا ولف صاير بلا حد
مثل سيف اليكص ركبه بلا حد
كلتلي انتظري انه ارجع بالاحد
اجه الاحد يمته تعود اليه

احد سجين صبري وجن ولا حد
التفت وما شفت ربعي ولا حد
اشجم سبت اليمر بيه والاحد
اجي بس شوفتج تصعب عليه

لتهم بالعمر خلصان وحده
وانه ضعني سرا بالهوى وحده
حلت جنها بعيونك غير وحده
وكمت ما تسال ولا تمر بيه

غيرج ما حله بعيني ولا طاب
ولا دونج دخل كلبي ولا طاب
يجرحي وياج لا هود ولا طاب
دم ينزف ولا تدرين بيه

محبتك تجري وي روحي ويه دماي
وعليك انشلت اعظامي ويدماي
انجويت انه ابيد انه ناري ويدماي
ولكن من يطابكهن سويه

عليج الروح راحت من يردها
و وكيحه همومي صارت من يردها
خطيه الروح ملت من يردها
لان بس الصبر يبسل عليه

الا تظلم دليلي اياك وياك
انه طفيتك وجف الغير وياك
صدك من علي تهد وياك
اهد وافزع وطك بثنين اديه

شكثر هم بدليلي يامه عانه
وتعذب يامه ويامه عانه
يعمي انته معاهم يا معانه
تهد وتفازع وتاهت عليه

عسا بعدك كصير العمر لا طال
يمن وجهك بعد عالعين لا طال
ردي حظي ولشخصك ابد لا طال
لون محظوظ كلك بين اديه