اخذ بالجنه قصري

**طيف الدليمي** · 2009-10-19, 03:57 PM

قدر نصبني شاعر لو بدي ماصير
وأعيش اويه الرعية أبنفس قالبهه

اصدگ بالجرايد وامشي للكشاف
واحكم عالزلم من طول شاربهه

يحسبون الصبحهم حتى يتريگون
مشكلتي اختلف مو هيج حاسبهه

آنه اريوگي ورده ابعتبة الشباك
اتميل ابطولهه وأحساسي يحلبهه

سعادتهم تعاسه ابعالمي الشفاف
وضحكتهم بواجي أوعيدهم جبهه

كلمن عنده جذبه ايگولهه ابنيسان
لعبه ابلا مشاعر استحي العبهه

ماعودت روحي اتجذب ابنيسان
خاف أبشهر آب الناس اسلبهه

كالو بعد لأحد يصدف الاثنين
من حقي اعترض ولحاله اجذبهه

الثنين المر علي نفس احد المشؤوم
هم سميته احد كودن ايشبهه

ضحكو من كلامي صعب يفتهمون
ماعدهم نباهه اوكلهه منتبهه

صاحو لاتكمل انعل الشيطان
افكارك غريبه امنين جايبهه

رجموني ابخطب نايم عليهه اتراب
ماصدگ بعضهه.اونصهه.واغلبهه

سوالف راكده ابمستنقع التكرار
توصل للاذن تعلسهه وتذبهه

كرهوني لان جادلت.بس للقير
مامضطر احب اشياء ماحبهه

يعجبني الحجاب ابروس البنيات
بس ارفض بنات افكاري احجبهه

تجار المنابر برجوازيين
محلات الذهب مو هيج مكسبهه

صاحبتك الدنيه واظن كلش عيب
اتصرخ فانيه اوتلعنهه وتسبهه

اخذ بالجنه قصري انطيني كوخ ابجول
وخذ مليون ركعه اباسمك اكتبهه

جرب مثلي عيش ابغرفه العمدان
خمس اطفال وامهم گوه اعتبهه

على خلوة غزل اجبرهم اينامون
ماجنهه ام جهالي .جني ناهبهه

اريدابكلشي اصارح قررت ماخاف
اذاني السكوت اعصابي تعبهه

امخليلي قلم خاطر يحلي الجيب!!
الجيب الخاوي خاوي القلم مينبهه

احس ماتت حقيقه ابمعركة تزوير
اوعيب اعلى الاقلام اتضم مخالبهه

النقط فوگ الحروف ايحطهه من ايثور
اوسلاطين الدهر ماحطته ابعبهه

**HamaDa** · 2009-10-19, 04:21 PM

عاشت ايدك ياورد
موضوع راائع
دومك مبدع عيوني
تحيااي الك

**دمعة ألم** · 2009-10-19, 05:46 PM

عاشت ايدك وردة
دوم الابداع والتميز عنوانك
تحياتي الك
وردة

**طيف الدليمي** · 2009-10-20, 02:13 PM

**((&&--- شـكـراً جـزيـلاً عـلـى الـمـرور الـجـمـيـل ---&&))**

**((&&--- گل حبي واحترامي الى من يضف رد لي ---&&))**

**nosnos** · 2009-10-20, 05:33 PM

سلمت اناملك
ابدعت
تحياتي الك

**طيف الدليمي** · 2009-10-21, 05:40 PM

**((&&--- شـكـراً جـزيـلاً عـلـى الـمـرور الـجـمـيـل ---&&))**
**((&&--- گل حبي واحترامي الى من يضف رد لي ---&&))**

الموضوع: اخذ بالجنه قصري