باب الصبر

**مـوتـي ولا مـوـت أحسـاسـي** · 2010-04-25, 03:06 PM

على باب الصبركل يوم اتانيه
واتاني الدمعة تصرخ خاطر ابجيهه
لان كلبي بغيابه مثل ريشة طير
وبس ريح الشماته الي تهز بيهه
امس بالليل روحي عطشت لملكاه
لان طولة نهر مو غيره يرويهه
وكمت ابجي وانوحن لو يمر طاريه
واريد عيوني يمه لو يخليهه
وبكثر دمعات عيني اليوم انة مشتاك واتمنى سنيني يمه تكون تاليهه
صارت عيني ظلمة وماشوف النور
لان طيفك حبيبي الي يضويهه
انة روحي وردة وذبلاهه الشوك
يمتة تحن دكلي ومرة تزكيهه
صدكني من احن واذكر ايامي وياك
احس كلبي حضارة يريد يفنيهه
انة ردتك تجيني بوحشة الايام كبل ماحالي قصة يريد ينهيهه
وانة ردتك دوة لو طحت بالاهات
واذا كبرت روحي انت تشفيهه
صدكني بغيابك كمت اخط اشعار
وافز بالليل وحدي وكمت اغنيهه
شني من كلب عندك مايحن فد يوم
ولا يذكر سوالف جنة نحجيهه
انة كلبي سفينة وغركت من سنين مايلحك بعد لو نوح ينجيهه
انة بعدك بجيت وهدمتهه الروح
بس اصبر واكابر وراجع ابنيهه
انة رايد اكلك ولو بعد كلمات لجن كلما اشوفك خايف احجيهه
صدكني من اشوفك كلشي بية يطيب
لان دمعات عيني ضماد اسويهه
ولو خليت بية جرح كل لحضة ملجوم
واذا ماتن جروحي انت تحييهه
شفت طول المسافة ماتحدهه حدود
رغم تعبن جدامي بس لازم امشيهه
لكن كاعي ماتت والليالي طوال واظن سيف الصبر بس هو يحنيهه
شفت بالضيم حالي والعتب عالعين ودعيت العين كون الضيم يعميهه
اثر ذيج الليالي ماظنه يروح اذا راح الاثر مااظنه يمحيهه.