لا تحط بيدي الشمس واحلامي بيك ولا تهيج عالفقير جروحة

**سامحني يا موطني** · 2011-09-29, 03:28 PM

لاتحط بيدي الشمس واحلامي بيك ولا تهيج عالفقير جروحه ولا تكلي بعسرك ويسرك اعيش وانتة قصرك للسماء يمد روحة عوفني بحالي ترا اني بليه ايد وانتة شباجك زحل ما لوحة شلون ما تدري الحلم جرح الفقير ما تشوف احلامه كد جروحه روحي مذبوحة ذبح وتريد اطير منيلي حظ يطير المذبوحة لا تأمنلي بحجي الماجاسة ظيم جفي دك بوب السماء المفتوحة وحظي دك اثبات بجناح الفقير لا يصعده ولا ينزل سطوحة انتة بعدك ما نمت فوك الحصير وغمست لكمة ملح بملوحة لاتلامسني بطرف صدرك اذو ب اني من دم ولحم مو لوحة ولا تمرجحني برمش عينك اخاف اني ما شايف رمش مرجوحة ولا تكلي اتمرجح شمالك تخاف جنت اريدك للسمة توديني بس اخافأ ينكطع رمشك واطيح وباجر تكلي طحت من عيني روح دولك محب يرهم عليك اني قاموس العشك طاويني ما عشكتك واحنة بالطيش استحيت شلون احبك من تجي تلافيني خلني راظي بفقري وانتة ارضى بغناك وعوف عيسى بدينة واني بديني ولو خلاني الوكت بعت اللالحاف يعني هسة بكيفي امد رجليني لاكن ادري بدربي عن دربك بعيد ومن صغر هذا الفرق بجاني انتة دفاك الثلج علاتموت واني ميت والثلج دفاني وانتة كاروك الذهب ما كفة اديك واني كاروك الكصب كفاني وحتة لا احلم وامد جفي لسماك واني ارضع كمطو ذرعاني ...........؟؟