عاد بعد الندم بس شيفيد الندم

**نونه البزونه** · 2009-01-31, 07:57 PM

المن جيت ناوي تصحي الجروح
جروحي الماتريدك والله ناسيتك

كدامك طحت وتشوف ترس العين
بس لمن طحت كلي انه لميتك

المن جاي هسه تريد بس ملكاي
قصتي وياك ماتت لمن احجيتك

عقل الكلب انت الساكن بهل الروح
خبلت الكلب مجنون سميتك

من كثر البجي بالدمع خظر شيب
لا تمسح ادموعي تشيب جفيتك

دليتك نعم وين الجروح تصير
دليتك علي مايوم ذليتك؟

ربيتك طفل أنتظر منك شوك
وعالحنيه مو عالقسوه ربيتك!

صرت دمعه انه اريدك كون ترتاح
تبجيني عمر مايوم بجيتك

انت بروحي انت ويه النفس تندار
مل مني النفس بالنفس خليتك

كضيت العمر وياك بس معذور
بس معذور تالي الغيري عذريتك؟

ياكوكب زحل بيك الحياة تموت
ورغم ماكو هوه بس اني شميتك!

كلمه شكد اكلك اوفي بيهه سنين
وعلكهه حرز وتصير ترجيتك

أحبك جنت اكلك وانت اوفي وياي
ياكلمة وفه شكد تعبت صيتك

ياجرح العمر ياخنجر البروح
ياملح الجرح وشكثر حبيتك

نيتك ظلمه جانت وأشتعلك نور
وعلى ظلمه الليل تعودت نيتك

خليني بجرح احزاني تلجم ليش؟
المن جاي هسه تكلي حسيتك

احساسك توفه وكبره طك بي شيب
من صارت عيونك صبخه حسيتك

ادليك اعله روحي وانه تايهه بيك
واندلك واتيهه تالي دليتك

تحياتي