كبر جرحك ياعراق العراق ليا وكت دمعاتك تسيل
وتظل ليا وكت كطع المناحر
وتظل ليا وكت متوسدك الموت
كلي هذا حلم لو هذا حاضر
العراق انته صرت عشاك الاحزان
مثل طبع السجن ويه المحاجر
خناجر وانبتت بضلعك اليوم
وماتطلع بعد هاي الخناجر
مبيوع وصرت مابين هذا وذاك
بدلوك بفحم وانته الجواهر
بجت اور ويا بابل صبن دموم
جن شافن عراق بلا ستائر
وشكن زيجهن ويا صرخت آشور
لئن شافن حراميهن مناطر
وصعد دم الشعب يعراق ليفوك
وخضرت شجر من دمنه المكابر
وصرخ سعف النخل لن صار رماح
ونهض جذع النخل ولسيفه شاهر
ونهض بعض الشعب من شافك طيح
ورجع بالطف يصول ويوم عاشر
وأيده اتلاوي ظلت ساعد الموت
وظل من الجثث يبني السواتر
بس ظيم وظلايم شعبك يعيش
مو كافي بعد ياوطن صابر
وياشعبي اشوكت من نومك اتكوم
وتعيد الثوره اثارتها العشاير
دنسوها المصاحف واعتدو عالدين
وصارن يالوطن جمله المجازر
اذا كل هذا صار وجن كلشي ماصار
اذن واحدكم هوه بلا مشاعر
واذا ماكو الضمير اليصحه عالصار
جا كلي شوكت تصحه الضماير
واذا ماكو مناصر الينصر الدين
واذا ماكو بعد بالوطن ثائر
اخلي القلم بيدي يصول كالسيف
واطبر بيه بحلوك الدفاتر
واطبــــر بيــــه بحلوك الدفاتـــــــــــــــر
