ادوّر بيك زلّه ، او طبع ما مقبول

**nosnos** · 2010-08-04, 03:59 PM

ادوّر بيك زلّه ، او طبع ما مقبول
حتى اقنع واگول .. الهالسبب عفته

اگلب بيك يمنه او يسرة ماخليّت
عساني الگه خلل من گبل ماشفته

او صدفة اكتشف بيك اطباع مو عالبال
عند الغير خلّه او حلوة بيك انت

من صاحب يجرحك ، ابد ماتغتاض
وابلغ من كلامك عندك السكته

او تطش جرحك ابضحكة ، او چنّك إلنه اتگول
خير الجمر ، خير ابحضن منقلته

ام هم بيك اكتشفت الطيبة مو بحدود
اشألذ من روح كل هالطيب شايلته

او تتلگه اليحسدونك واليغارون
إبراءة طفل والضحكات سالفته

اريد آنه اعوفك ، گلي انت اشلون
دخيلك ، ريح گلبي او حليّ مشكلته

صير اوياي قاسي ، قاسي حيل اوياي
او سمّعني كلام الگبل ماگلته

رجل شرقي ، واذا يجرحني اغله انسان
غلاته انساها واكتب بيدي خاتمته

ولكن وردة انت ، اشتجرح الوردة
او ترافة كون كله ابخدها شايلته

حل انطيني يالامنتك الاحساس
مثل سر ابضريح ايمام امنته

وحگك ، مانهار المر علي مرتاح
ولا ليلي مثل باقي البشر نمته

صرت حال المغني الينزف اوي الناي
او على همه او ونينه الناس حاسدته

ردت الصبر عون او اسف خان اوياي
او من صحتي نطيته او ابد ماخنته

يمته ارسه اعله حل ، يمته دخيلك عاد
القلق عندي ابشرك ناخ راحلته

او من گد ما يمته اصيحن يمته احلها اوياك
عالناس امن اسلّم انطق ابيمته

عالناس امن اسلّم انطق ابيمته

للمبدع رياض الركابي