أخواني المؤمنين من كل الأديان أريدكم بموضوع....

[MR_CoOL]

مساء الخيرات على كل المسترية

أحب أحجي وية كل أعضاء قسمنا العزيز و كل ضيف يمر بقسمنا ...

الحمدلله على نعمة الأيمان وأنشالله خوف رب العالمين والطمع المستمر برحمة و بركتة تظل دوم بقلوبنا..

شباب كلكم راع و كلكم امسؤول عن رعيته......والنبي (ص) استرسل بصفات الراع فمرة يخاطب الأب و مرة الابن و مرة الحاكم و كان يكدر يستمر أكثر و اكثر بس الهدف من التكرار هو التعميم و التحسيس بالمسؤولية أكثر و أكثر ..

الله عز و جل أستخلفنا بهالأرض حتى انعمرّها و نبنيها و نقدس أسم الخالق و نحمده على كل فضل و نعمه أنعمها علينا وخلانا بيها..

وشلون ما انزل الله القرآن عالمسلمين أنزل قبله الانجيل على اهلنا و اخواننا أهل الكتاب المسيحيين أتباع كلمة الله عيسى أبن مريم سلام الله عليه وعلى امه العذراء.

مصدر كل الرسالات السماوية هو واحد وهو رب العالمين و لو نحاول نقارن الكتب السماوية مع بعضها فنلكي أغلب المكتوب بيها هو الدعوة للأصلاح و تعميق الأواصر بين المؤمنين و المحبة والسلام و الخوف من الشر والشيطان و اتباعه و الدعوة للصلاح و أصلاح المجتمع....كل دين نزل بوقت معين و اله ظروفة و محيطه النزل بيه..وأكيد واحد كمّل الثاني أكثر و أكثر...

نلاحظ كلنا ان هالأرض اللي أحنى بيها لله أكرمها بالرسالات السماوية الثلاثة الأسلام والنصرانية واليهودية.....شنو معنى هالشي؟؟؟

هل رب العالمين ما يشوف بس هالبقعة من الارض و هامل باقي خلقه ؟؟ حاشاه من هالشي أكيد...

رب العالمين استبصر الخير بهالشعوب الموجودة بهالبقعة من العالم و اللي أرتأى أنهم افضل من يأتمنهم على دينه و كتابه ونشر السلام والمحبة والأخوية والايمان بين الكوكب و تكريمه بتكليم نبي مرسل الهم و نبي آخر ولد من أطهر نساء الكوكب....ونبي ختم بيه كل رسالاته و كتبه....هالشي هو الوديعة اللي استودعها الله عدنا..

نجي على احنة شلون جازيناها ....

اليوم للأسف هالمنطقة أكثر بقع العالم بها الحروب و النزاعات الدينية والطائفية......بقعة من أغنى بقاع الدنيا وشعوبها جائعة وقدراتها مفقودة و شعوبها مهاجرة لوراء الشمس تترك أبرك مكان بالدنيا و ترتضي بلجوء بأطراف الكوكب وما تطلع الشمس عليهم بس كم ساعة باليوم...

الجار يغتاب جاره لأنه من دين أو مذهب مختلف....الجار يحلل مال جاره و عرضه لأن يعتقد بهالشي رح ينتصر على جاره...اولاد العم يقتلوا بعض لأختلاف المذهب....اتباع عيسى يخافوا تهجير اتباع محمد ....اتباع محمد يكفّروا أتباع محمد....أتباع محمد يحللوا دم اتباع محمد...

سؤالي بسيط....لو اليوم يظهر النبي (ص) او سيدنا عيسى ابن مريم سلام الله عليه....ويخلون عيونهم بعيونك.....ويسألونك هل فد يوم شلت بقلبك على أحد من أتباعي لأن ما صلى مثلك شنو رح تجاوبه؟؟؟

أتنبّه النبي (ص) عينه بعينك.....ويباوع عليك ...

ربّك يسألك بالمنام.....هل أصلحت الارض اللي أستخلفتك عليها ؟؟؟ شرح تجاوب ؟؟

هل تشكرني على نعمة الصحة والعافية ؟؟؟ هل تصليلي ؟؟؟
هل تجتزء ولو شوي من اللي انا منطيه الك وتساعد اللي ما عنده فلوس يروح يجيب كميّته !...

500 دينار باليوم....!

شنو رح تجاوبه؟؟؟

مولانا المسيح خلي عينه بعينك و يسألك .....ربي و ربك يكول بكتاب نبيك طعام أهل الكتاب حل لكم...كم مرة كسرت خاطر جارك المسيحي لما يقدملك شي و ترفض تاكله؟؟

أخوية المسيحي ...كم مرة كلت على فلان و فلان شعليه بيهم خلي نارهم تاكل حطبهم؟؟؟

محد ديشوفك ..صارح نفسك......هل كلت هالشي فد يوم بينك و بين نفسك لأخوانك بالأيمان والأنسانية؟

أزين كلي بعقيدتك تعتقد أن المسيح أنصلب حتى يخلص العالم من الشر والآلام....هل يقبل يسوع أن مؤمن يفرح او ما يهتم بمقتل مؤمن؟؟؟

مو يسوع يطلب من الله ويكول حسب ما الرواية تكول لما زاد أذى الغير مؤمنين عليه : اغفر لهم انهم لا يعلمون؟؟

كم مرة انته يا أخوية المسيحي طلبت من ربك بأصدق نيتك بأخلص أيمانك أن ينشر الرحمة والأمان على كل شعبك و تألمت لما تسمع بقتل و تهجير اخوانك بالوطن...

أخوية الشيعي...الحسين (ع) أستشهد حتى ينصر الحق..الحسين موقف و شهادة..ألحسين كلمة ...الحسين شمعة تنير درب الأيمان بقلوبنا ...

كلي كم مرة حاولت صدقا بدون تبين مذهبك أن تقوم بعمل كبير بيه نفحة أسلامية وتسوييه وتكول هالشي من المسلم لأخوه المسلم.بدون ذكر مذهب..

أما اللي قتل و ذبح ويكول هذا كافر و هذا مرتد.....مو ربك فوكك و ديشوفك بعيونه الما تنام.....

النبي (ص) غضب على 2 من اخلص المسلمين ايمانا لأنهم قتوا 2 من الكفار ولما كلوله يا رسول الله هذولي بس تفوهوا بالشهادة دفعا للقتل..جاوبهم النبي هل فتحتوا صدرهم و شفتوا بيه نور الايمان لو لأ ؟!

هل أنته و دتذبح أخوك المسلم تدري اذا هالمسلم الله راضي عليه لو لأ؟ او أكو صدقا ايمان بقلبه و حب للدين؟؟

***************

أتمنى محد اخذ الموضوع بصورة شخصية لأن هالشي أبد مو ببالي وأكيد ما رايد أنتقد احد بشخصه

بس اللي أريد أوصله....الله أستخلفنا على وطننا الغالي ..وطننا الكبير ...مهد الرسالات والأنبياء والأولياء والناس الخيرة كلهم...شنو اللي قدمناه لهالأرض؟؟وشلون صننا الأمانة؟؟

أخوان ترى كل واحد بينا احنا المؤمنين مسلمين و نصارى ..شيعة وسنة ....عرب و عجم و اتراك....لما بنهاية اليوم انخلي راسنا عالمخده أنكول ربي احمدك على الصحة والعافية...

ولما نكعد الصبح انكول ربي باركلي بيومي هذا....ولما نخلص أكلنا نكول يا رب ديم هالنعمة علي و على اهلي.....

هذا هو الأيمان الحق ....والمفروض أيد بأيد نعمق هالأيمان بقلوبنا ونعكسه واقع حال على حياتنا العملية.....كل واحد من عدنا من تعاليم دينة..او الماشي عليه بمذهبه...

المهم العمل والنتيجة والخير اللي يستحصل منها والفائدة اللي تفيدها للمجتمع مو المهم شنو الكلمات اللي ترددها بينك و بين ربك...لأن هالشي بينك و بين ربك انته ..محد رح يحاسبك عليها غير ربك انته .....يا اما تثاب بالأخرة بجنات عدن او تعاقب....


أتمنى كلنا نبني سوه هالبلد اللي ينبجي على حاله بدل ما نعمق خلافاتنا اكثر و أكثر و ندمر المستقبل شلون ما دمرنا الماضي و شوي من الحاضر..

خالننطي فرصة للأجيال القادمة شوي تشوف خير


أرجو أن يكون كلامي خفيف على قلوبكم

أخوكم

خالد

احدث المواضيع:

• الاعلان عن مكان تابوت السكينة واصحاب الكهف والرقيم
• عاجل جدآ ؟؟؟ بيان لسماحة المرجع العراقي العربي ؟؟
• مفاجأة قناة البرهان الفضائية
• قناة البرهان الفضائية
• التدخين :خطره و حكمه في الاسلام
• أنبياء الله‎
• افتتاح موقع القران الكريم ضمن شبكة عراق الكل الترفيهية
• أنظر لحياتك بعين الحب، أعظم حب حب الله ورسوله
• اشتقت إلى أن أتزوج
• الأساءة للرسول !!! وطلب المعاملة بالمثل..فيامسلمين لما السكون

[عراقية كوول]

تسلم خالد
موضوع روعه
بارك الله فيك
وكثر من امثالك
دمت بحفظ الباري
تحيه طيبه

[•كہاتہم الاـح°زانہ•]

عاشت ايدك حبي
دومك مبدعه
بطرح مواضيعك

تحياتي الك
ئاسان

[HiT_M@n]

بارك ألله بيك ..

[العميد نهاد العراقي]

بارك الله بيكِ
والله كلامك كوله صحيح
و تسلم ايدك على الموضوع الرائع
دمت بحفظ الرحمن
العميد نهاد العراقي