اعــــــــــترف

**nosnos** · 2009-11-13, 07:43 PM

كبلج اي نعم كومه اعرفت حلوات
وشكد عاشرت اشكاال فوك اشكال
جنت اسهر واسولف ويه هاي وذيج
واغازل كل جميله وكل شعر ميال

وحبيت انه كبلج من صدك مرات
وعشت كل القصص بسنين حيل طوال
انه انسان عندي احساس عندي ذنوب
كومه ذنوب عندي وصعبه ماتنشال
عندي احسان عندي اجنون أي انسان
افكر ماهديت ولا صفالي البال

هاذ اني بصراحه وما اجذب اعليج
واقع حال هذا البييه واقع حال

وهسه تغيرت والسبب انتي اليوم
نظامج غيراني وغير اطباعي

جزت من السهر والليل والنجمات
طبت من الجرح واتبخر اصداعي
واذا اسهر اضل اكتب الج اشعار
لان بس بيج احس بشعري وابداعي
بتــــلاثه الضهر موعدنه من يصير
بالسبعه الصبح اكعد واضل واعي

مسحت ذنوبي كلهن من جديد ابديت
ومن عينج بديت برفعة اشراعي

داويلي الجرح دكتورة اوجاعـــي
كل يوم بمحبتج تكثر اطماعي

انتي عيوني صرتي وانتي كل الشوف
انتي الماي صرتيلي بعطش كاعي

حبيني اعله كيفج وانه بين ايديج
وماضي العشته مات وماله أي داعي

غيرتيني انتي من الجدم للراس
نظامج غيراني وغيراطباعي