أقســـــــــى الفــــــــــــراق ..~

**طيف الدليمي** · 2010-02-11, 10:55 AM

أقسى الفراق..معامله..مـا هـو أجسـاد
آخيـر مـن وصله..فـراق الكرامـه.!!

الموت..لاساقـك صفـا القلب..نـشّـاد
و ردّ..و ردّه مثـل فعله..رخـامـه..!!

يتهـدّم وفـا قلبك..لـو قصـوره شـداد
لك العتب مـن طيب..عـوّد ملامـه..!!

يرجع سؤالك جرح..ما اشفـى ولا فـاد
و سـؤال ثانـي فـوق هـم الندامـه..!!

يسيـل حيـره..فـي حنـايـاك تــزداد
مقامـك اللـي طــاح..ولاّ مقـامـه؟؟!

المشكلـه: مـدري غبا..مـدري عـنـاد
يرفض (صباح آسف) يضوّي ظلامـه..!!

عـن الصـح ماكنّـه تجـاوز ولا حـاد
حاول يسولف عقـب باهـت سلامـه..!!

عن الغـلا و الحـب لـك بالحكـي زاد
و صوت الفعل أوضح و أصدق كلامه..!!

تخـاف لاعدّيـت لـه مــره أعـتـاد
و حسّ الغلا خلاّك..تضعـف أمامـه..!!

حدّك تجـي حـازم و لـو ينتـج بعـاد
فراقك أرحـم مـن هوانك..سهامـه..!!

مـواصـلٍ يــزداد عــلاّت تنـعـاد
ضمير يفضح وهم..طاحـت خيامـه..!