يحسدونه شكثر حسبونه عل العشاق

**دمعة ألم** · 2010-03-01, 07:18 PM

ما مرتاح طبعاً والحچي ما يفيد
وبعد ما ظل صبر كافي الصبرته

بالحب تختلف ما اختلف وياك
بس عوض گلب مني الاخذته

مليت انتظر باچر تجي وما جاي
عگب باچر أجه وما جيت انته !؟

واسهر والسهر ريشه أبمهب الريح
وأحس حتى الگمر عاتبني سكته

وگلي اشحصلت من عمري ذاك ألفات
إذا نص العمر لجلك سهرته

وإذا بيه الذنب فهمني خل ارتاح
وإذا بيك الذنب رغماً قبلته

يحسدونه شكثر حسبونه عالعشاگ
ويگلولي شكثر من عدنه بگته

وگتلهم چذب بس بالأسم محبوب
ومتندم على يوم العرفَته

لأن طبع اليحب معروف عند الناس
صافن والحچي كله ابصفنته

وانته لا تحن لا مثلي هم تشتاگ
وقانون العشگ وحدك عزفته

موهيچ اليحب گلب اليحب ولهان
ولا گلب اليحب هم هيچ دگته

كل ساعه احترگ طافيني دمع العين
وترجع حضرتك ثاني وشعلته

ومثل عالم صرت بس تخترع الأعذار
ولعلمك نعم هسه فتهمته

بستانك حزن منه جنيت أهموم
ماجاني الفرح لايوم ضگته

كافي بطلت رجعلي گلبي النوب
مااريد العشگ ماعندي بخته

وباچر لا تجي ودّگ على الباب
مفتاحك لأن أصلا كسرته

وتتندم علي تحلم تردلي بيوم
وخط رجعه چذب سولفهه نكته

وازيدك بالشعر بيتين مو بس بيت
ألبومك للصور بيدي حرگته

ورسمك لو طفل والعين امه اتصير
من عيني بعد صدگ فطمته !!!

وخسران اعترف والحب تجاره صار
وبايع مشتري كل شي خسرته
منقول للامانة

تحياتي
دمعة ألم