انت العين

**عراقيه حلوه** · 2010-05-07, 05:39 PM

انت العين واقرب من جفنها انت
انت الوالد اليحظن بديه وليدة وبنتة
وبالتوحيد انت الشعب كلة بشيعتة وسنتة
منهو الكال ناسيك هم ينسى الكَمر وكتة
لو نبض الكَلب يتنكر لدكتة
بس عشكَك عشكَ مفضوح
وعشك الناس كلها مساتر وسكتة
صرت انت سبت وبركَبة يهودي
هم شايف يهودي يجوز من سبتة
انت الفارس اليسبق هبوب الريح
وما اظن خيل سابقتة
وانت انت يرهم ترابك كحل للعين
ودوا للما شفت علتة
ومن طينك نحني جفوف المعرسين
وكل اصبع فرح من تك طكَتة
وانت ريحة ترابك ترد الروح
هيل وزعفران وعنبر بشمتة
ومثل تراب كاعك مالكَينا تراب
يرهم للصلاة من طين تتربتة
انت ينام بيك المرتضى الكرار
ابو الحسنين التلوذ الناس كلها بشارتة وبختة
وانت ينام بيك بكربلاء حسين
الما باع نطاقة وسلم ركَبتة (رقبتة)
وبيك ظلت راية العباس
لمن طاح ..... نزلة الفرات وباسة من شفتة
من طلعت منك يوم طرني البين
كلبي وياي ماجبتة اثاريني نسيتة هناك عندك كَلبي امنتة
شتلتة بجرف دجلة الخير
وي طين الشواطي شربكَتة
وامتدت عروكَة بوسط ذيج الكاع (عروكَة=عروقه)
ومن ماي الفرات ودجلة عمدتة
ولمن صار ينقل جدمة بين الناس
اخذتة وياي للكاظم على الشباك زورتة
صح هسة اصبحت من وطن نيدرلاند
هولندي الهوية وشعري جللتة (شعر الراس بالجل)
وصح تاقلمت وية الغرب فد نوب
وصرت ماصخ مثلهم والملح عفتة
وصح صرت ارطن رطنهم لمن يرطنون
ولسان العرب بالاعجمي كسرتة
لكن مدري شي يصير بية من يمر طاريك
احسة انك دفو تموز وحرتة
العالم نسى ايام اهدعش من ايلول
وصارت بيك وبيك سالفتة
ناس تكول لازم نحتوية ونشفط البترول
ونعوض الراح ونسرق بركتة
وناس تكول لازم هالحصار يدوم
وناس تكول لازم ننزع اسلحتة
وناس تكول خطية اطفالة ماتو من الجوع
وناس تكول حيل وياه ما حمد ربة وشاكر نعمتة
جيف انت حلو والدول منك تغار
ما عدهم العندك من مجد نلتة
انت اول وطن ادم وضع جدمة علية وكال يا الله ولنك وصلة من جنة
انت اول وطن حطة النبي ابراهيم ودعا ربة يصونة برحمتة وعزتة
وانت اول وطن مرسى لسفينة نوح
وانت اول وطن النبي ايوب ناخت بيك راحلتة
وانت اول وطن علم العالم ابجدية ويكتب التاريخ
وانت اول وطن قانون سننتة
انت اول وطن كالتلة الشمس يمة صباح الخير
انت اول وطن ماتشبة الاوطان
سبحان ربي شلون صورتة
صورتة العراق وبس علينة يلوكَ
واحنة نلوكَلة لمن يحن وكتة
هذولة اهل الغدر من عندك شيردون
يا هو صاح منهم ما اجو عندك
جان جيبك موس الك لمن العرب ينخوك
عزيز المال هيج وهيج طشرتة
لمن طحت محد اجى وكال عدعيناك ونزفك مثل دمع الشمع سقتة
بقيت وحيد مدمي بساحة الميدان واطفالك عليك بصفك ينوحون
وانت تون ولا مثلك قبل مذبوح ونونتة
توجيت على جرحك كمت مهتميت
خاف الشامت يشوفك طريح ويشتفي بشمتة
طبع بيك المكابر اكبر من الاه (بس)
واكبر من غدرهم يا بختك انتة
جم غازي مر عليك وراح
وتمر علية السنين ومتعمر بذلتة
صفو بالمزبلة ويلعنهم التاريخ
تراب بلادنة يرفض جدم الغازي والمحتل
تراب بلادنة غالي واغلى من عدن