ماكذبت أمي عليّ .. يوم قالت ..

**عراقيه حلوه** · 2011-02-15, 10:11 PM

ماكذبت أمي عليّ .. يوم قالت ..

لاتنام إلا متوضي ..
وصل .. لله ركعتين ..
واقرأ لك لو آيتين ..
وارفع يديك وتضرع .. بالدعاء ..
يشرق النور بجبينك ..
ماتجيك أحلام توحش ..
وماتقوم الصبح ..
مهموم .. وحزين ..

ماكذبت أمي عليّ .. يوم قالت ..

لاتفرط في صلاتك ..
ولايغرك حب ذاتك ..
ولايبل الريق مسكر ..
حتى لو يبست لهاتك ..
احرص .. تصلى جماعه ..
وكل ساعة ..
راقب الله في حياتك ..

ماكذبت أمي عليّ .. يوم قالت ..

لاتصير إنسان جارح ..
اضحك بوجه الجميع ..
عامل الناس بتسامح ..
لاتفرط في حقوقك ..
لاتجامل في النصائح ..
ولاتثور .. تصير فاضح ..
وإن لمست عيب صاحب ..
لاتنافق .. ولاتصارح ..
وانتبه من هالنصيحه ..
لاتصير إنسان غامض ..
ولاتصير إنسان واضح ..

ماكذبت أمي عليّ .. يوم قالت ..

احذر .. أولادك ومالك ..
لاتجافيهم وتقسى ..
ولاتبالغ في دلالك ..
ربهم بالخير .. تربح
وعلم النفس القناعة ..
وعلم القلب الشجاعة ..
ولاتغطي العين وتحلم ..
وتخدع الرأي بخيالك ..

ماكذبت أمي عليّ .. يوم قالت ..
انتبه .. لاتبني دارك
قبل ماتختار جارك
وفكر بحق المجوره!!!
لايحس إنك ظلمته ..
وإلا إنك يوم خنّته ..
وإلا تؤذيه بصغارك ..

ماكذبت أمي عليّ .. يوم قالت ..

إن وعدتَ وعد .. فاصدق
احذر تزل بلسانك ..
أو تقلل يوم شانك ..
عش عزيز النفس تسلم ..
حاجتك للناس .. علقم ..
لاتبين ضعف حالك ..
أو يغرك زود مالك ..
ولاتهين إنسان .. تندم .

ماكذبت أمي عليّ .. يوم قالت ..
خلك إنسان بكرامه ..
لاتغرك هالأمور ..
المناصب ..
والقصور ..
فكَّر بيوم القيامة ..
فكَّر إنك ماأنت خالد ..
رحلة الدنيا قصيرة ..
تلقى نفسك في سلامه ..
ماكذبت أمي عليّ .. يوم قالت ..
احذر تصير البخيل ..
واحذر تبذر وتطّغى ..
واحذر تعيش بخساسه ..
أو ذليل ..
ولاتنام بيوم خالي ..
لاتنام بدون لاتفعل جميل ..
تلقى نفسك في معزه ..
تلقى روحك في شموخ ..
عش أصيل ..
ومت أصيل ..

ماكذبت أمي عليّ .. يوم قالت ..

لاتمل هموم حملك ..
ولاتظن الناس مثلك ..
واصنع أمرك من يمينك ..
لاتدور من يعينك ..
بين ربعك .. ولا أهلك ..
لاتعامل باللي تكره ..
ولا تجارم وإلا تشره..
هذي وصايا ..
لاتفرط في بعضها ..
ماتتوه الشمس عينك ..
أو تتوه الأرض رجلك ..
ياجنيني ها لأمانه
حاول تحملها طفلك !!

الله يـرحم كــل أمـوات المسلـمين