-
نسيتك لو تناسيت !!
عالحب گتلك البي تضحية يعيش
خذت رايي وسمعته وبية ضحيت
وشفت حفل افتتاح جروحي للناس
وشفتك من بعيد بروحي گصيت
طرت چن دمعة وبجنحينها رموش
وعلى شجرة ضحكتك سكته حطيت
خيل ظنوني طلعت خيل عرجاء
وانا مراهن عليها تفوز ظنيت
من شفتك اطش سنيني واللة
لأن بيهن حلا حسبالي چكليت
غشيم وگلت ماساوي اليلمون
عزت نفسي ما خلتني لميت
انا بــ لا وعي من اطيتك الروح
وعقل ماچان عندي وهسة فزيت
ماچذب واگلك باچر انساك
عفتني وذكريات هواية خليت
اذا كل حايط البي اسمك يطيح
على هالحالة لازم نهدم البيت
بأخير ايام عشت بروحك هواي
ديرة شايلين ووحشة حسيت
ظلمة وريح بيها وصوت بيبان
وردت اطلع ولكن ما اندليت
انا الباني السفينة ومو مثل نوح
صَعَدتَك وبالطوفان ظليت
وچبت عشب الخلود اطيتك اياة
وگلت احمل الفشلة وخالي رديت
بحرگتي وخفت تدريجيآ اشتاق
وخفت ردود قلبي يگلي حنيت
من دمعتي لحجيك وكت الوداع
خط وهمي بوكتها بچفي جريت
طلاسم نظرتك فكتها الاعذار
وبعيونك شگد الغاز حليت
چنت تحچيلي وايدي تهدم احلام
وبمعول دمعتي بقوة دگيت
بحيث من انتهيت من المواضيع ذيـچ الساعة
ماظل كلشي هديت
فدوة من يـنچفي يگولون عالماي
وفدوة شلون اگلك ماتبديت
انا شفتك ثلج بحلوگ شمات
معقولة بحلگهم ما حتريت
ماگتلي الرواية اخرها مبتور
چا بأول مشاهد مانشديت
ولو ادري اليظل ممنوع مرغوب
لارخصت روحي ولا انذليت
انة ابحرت بيك اعناد عالروج
وعلى خصر الشراع وزار شديت
الهوة هذا اليمرني اتخيلك بي
حته التقي وياك منين ماجيت
يعني بمعنى اخر مستحي احجيه
ترى بس انت غيرك ما اشتميت
وحررت اسمك من شفاف الغير
وعلمودك شگد حروب طبيت
وبعدت ذرائع قادر اجتاح
.ولكن شبر منك ما أحتليت
اكض الليل بيدي من اوگف وياك
بدليل شگد عليك نجوم طشيت
چنت اگدر اجيك بدون عنوان
وحته ادخل بگلبك لو اضطريت
علي محسوب سر وانته مگيول
وعلى ازغر اعدائك ما انظميت
ما عندك عذر ينگال للناس
يمي ومن حچيهم؟ ما افتكيت
لَهَسَة اكل بصبعي الاشرت بي
عليك وبي الف نيشان خليت
مثل حب الارض وية الشمس بي
چنت سطحي بنظرتي وفطرة حبيت
لو ادري الشمس ماتفتر وياي
على روحي بعشرتك ما افتريت
انة عابيت حته عيوني بچفاك
بيهن وبنظرهن مااعتزيت
مر يم بيتنا مستطرق وشوف
تلگة اباب بيتي عيون ذبيت
انة ظهري احترف طعنات العزاز
وگمت اعرف اديهم لو اندچيت
بلا شوف واگلهم ها منو فلان ؟
بس انته عكسهم ماتسميت
حته انساك لازم ينلغي الليل
اذا بالليل اذكرك چا سويت
واحتار من اظل ابين رائين
اذا عن رأي منهن ما استغنيت
بما انك عفتني بكل الاحوال
ماتفرق نسيتك لو تناسيت
احدث المواضيع:
-
رد: نسيتك لو تناسيت !!
روعه عاش هل الذوق الحلوووو اريد ابداعات هنا اريد تنافس هههههه
-
رد: نسيتك لو تناسيت !!
عاشت ايدج حبي كووولش توللللللللللش حلو يخنبش
هههههههه لا احنة نكدر انافس بس كوبس بيست وانت تكتب بقلمك
ميصير لازم احنة هم نكتب واحنة منعرف نكتب هههههههههههه
-
رد: نسيتك لو تناسيت !!
ههههههههههههه .. والله اني اكتب بس خآآف انزل شي واتفشــل
مشكـــورة ع المروور الرووووعه
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى
رد مع اقتباس
الفائــ بمسابقة اجمل طفل ــزة
